ಮಂಗಳೂರು ಐಸಿಎಐ ನಲ್ಲಿ 73 ನೇ ಗಣರಾಜ್ಯೋತ್ಸವದ ಸಂಭ್ರಮದಂದು ಕರ್ನಲ್ ಎ. ಕೆ. ಜಯಚಂದ್ರನ್ ಮತ್ತು ದಿನೇಶ್ ಕುಂದರ್ ಇವರನ್ನು ಸನ್ಮಾನಿಸಲಾಯಿತು

ಐಸಿಎಐ ಭವನ್, ಪಡಿಲಿನಲ್ಲಿ ಇರುವ ಭಾರತೀಯ ಲೆಕ್ಕ ಪರಿಶೋಧಕರ ಸಂಘ ಇದರ ಮಂಗಳೂರು ಶಾಖೆಯಲ್ಲಿ ಬುಧವಾರದಂದು 73 ನೇ ಗಣರಾಜ್ಯೋತ್ಸವನ್ನು ಆಚರಿಸಲಾಯಿತು. ಈ ಸಂದರ್ಭದಲ್ಲಿ ಮುಖ್ಯ ಅತಿಥಿಯಾಗಿದ್ದ ಕರ್ನಲ್ ಎ. ಕೆ. ಜಯಚಂದ್ರನ್ ಹಾಗೂ ಶ್ರೀ ದಿನೇಶ್ ಕುಂದರ್, ಮೇಲ್ವಿಚಾರಕರು, ಕಸ್ಟಮ್ಸ್ ಹಾಗೂ ಜಿ. ಎಸ್. ಟಿ. ಮಂಗಳೂರು ಇವರನ್ನು ಐಸಿಎಐ ವತಿಯಿಂದ ಸನ್ಮಾನಿಸಲಾಯಿತು. ಕರ್ನಲ್ ಎ. ಕೆ. ಜಯಚಂದ್ರನ್ ಅವರು ಧ್ವಜಾರೋಹಣವನ್ನು ಮಾಡಿದರು. ನಂತರ ನಡೆದ ಸಭಾ ಕಾರ್ಯ ಕ್ರಮದಲ್ಲಿ, ಮಂಗಳೂರು ಐಸಿಎಐನ ಅಧ್ಯಕ್ಷ ಸಿಎ ಕೆ ಸುಬ್ರಹ್ಮಣ್ಯ ಕಾಮತ್ ಅವರು ನೆರೆದಿರುವ ಸಿಎ ಪರಿವಾರನ್ನು ಸ್ವಾಗತಿಸಿದರು.

ಸಭಾ ಕಾರ್ಯಕ್ರಮದಲ್ಲಿ ಕರ್ನಲ್ ಎ. ಕೆ. ಜಯಚಂದ್ರನ್ ಅವರು ತಮ್ಮ ಅನುಭವದ ಮಾತುಗಳನ್ನು ನೆರೆದಿರುವ ಸಿಎ ಹಾಗೂ ಸಿಎ ವಿದ್ಯಾರ್ಥಿಗಳೊಂದಿಗೆ ಹಂಚಿಕೊಂಡರು. ಸನ್ಮಾನ ಸ್ವೀಕರಿಸಿದ ಶ್ರೀ ದಿನೇಶ್ ಕುಂದರ್ ಅವರು ತಮ್ಮ ಕ್ರೀಡಾ ಕ್ಷೇತ್ರದ ಅನುಭವ ಹಾಗೂ ಸಾಧನೆಯನ್ನು ತಿಳಿಸಿದರು. ನಿಕಟ ಪೂರ್ವ ಅಧ್ಯಕ್ಷ, ಸಿಎ ಎಸ್. ಎಸ್. ನಾಯಕ್, ಗಣರಾಜ್ಯೋತ್ಸವದ ಸಂದೇಶ ಹಾಗೂ ಧನ್ಯವಾದ ಸಮರ್ಪಣೆ ಮಾಡಿದರು. ಮಾಜಿ  ಅಧ್ಯಕ್ಷ ಸಿಎ ಕೆ ಅನಂತಪದ್ಮನಾಭ, ಕಾರ್ಯದರ್ಶಿ ಸಿಎ ಪ್ರಸನ್ನ ಶೆಣೈ, ಖಜಾಂಚಿ ಸಿಎ ಗೌತಮ್ ನಾಯಕ್ , ಮಂಗಳೂರು ಸಿಕಾಸ ಅಧ್ಯಕ್ಷ ಸಿಎ ಗೌತಮ್ ಪೈ, ಇತರ ಸಿಎ ಸದಸ್ಯರು ಹಾಗೂ ವಿದ್ಯಾರ್ಥಿಗಳು ಉಪಸ್ಥಿತರಿದ್ದರು. ಕಾರ್ಯಕ್ರಮವು ದೇಶ ಭಕ್ತಿ ಗೀತೆ ಹಾಗೂ ಅನೇಕ ನೃತ್ಯ ರೂಪಕಗಳಿಂದ ಸಂಪನ್ನಗೊಂಡಿತು.