ಭಟ್ಕಳ: ಉತ್ತರ ಕನ್ನಡ ಜಿಲ್ಲೆಯ ಭಟ್ಕಳ ತಾಲೂಕಿನಲ್ಲಿ ಕಂಡು ಕೇಳರಿಯದ ಭೀಕರ ನೆರೆಯಿಂದ ಸಂಪೂರ್ಣ ಮುಂಡಳ್ಳಿಯೇ ಮುಳುಗಿ ಭಾರೀ ಹಾನಿಯಾಗಿರುವ ಬೆನ್ನಲ್ಲಿಯೇ ಮುಂಡಳ್ಳಿಯಲ್ಲಿರುವ ನಂ.1 ಶಾಲೆಯ ಗೋಡೆಯೊಂದು ಕುಸಿದು ಹಾನಿಯಾಗಿರುವ ಘಟನೆ ನಡೆದಿದೆ.
ಮುಂಡಳ್ಳಿ ಮುಖ್ಯ ರಸ್ತೆಯಲ್ಲಿರುವ ಮುಂಡಳ್ಳಿ ನಂ.1 ಶಾಲೆಯ ಕೋಣೆಯ ಗೋಡೆಗಳು ತುಂಬಾ ಹಳೆಯವಾಗಿದ್ದು, ಮಣ್ಣು ಹಾಗೂ ಕಲ್ಲಿನಿಂದ ಕಟ್ಟಿದ ಗೋಡೆಯಾಗಿತ್ತು. ಇದು ಆ.3ರಂದು ರಾತ್ರಿ ಸುರಿದ ಮಳೆಗೆ ಆ. 7ರಂದು ಬೆಳಿಗ್ಗೆಯ 7 ಗಂಟೆಯ ಸುಮಾರಿಗೆ ಕುಸಿದು ಬಿದ್ದು ಇನ್ನೊಂದು ಕೊಠಡಿಯ ಗೋಡೆಗೂ ಕೂಡಾ ಹಾನಿಯಾಗಿದೆ ಎಂದು ತಿಳಿದು ಬಂದಿದೆ.
ಒಟ್ಟು ಎರಡು ಕೊಠಡಿಗಳಿಗೆ ಹಾನಿಯಾಗಿದ್ದು ರವಿವಾರ ಹಾಗೂ ಬೆಳಗಿನ ಸಮಯವಾದ್ದರಿಂದ ಯಾವುದೇ ಅನಾಹುತ ಸಂಭವಿಸಿಲ್ಲ. ಮಂಗಳೂರು ಹಂಚಿನ ಮೇಲ್ಚಾವಣಿಯಾಗಿದ್ದು ಮೇಲ್ಚಾವಣಿಯು ಸಂಪೂರ್ಣ ಬಿದ್ದು ಹೋಗಿದ್ದು ಹಂಚುಗಳು ಒಡೆದು ಚೂರಾಗಿದೆ ಎನ್ನಲಾಗಿದೆ.
ನಿರಂತರ ಮಳೆಯಿಂದ ಭಟ್ಕಳದವರ ಪರಿಸ್ಥಿತಿ ಹದಗೆಟ್ಟಿದೆ.
